Бұл жолы ерлер арасындағы ұлттық құрамамызға айрықша сенім артып едік. Өйткені біздің құраманың деңгейі шынымен-ақ жоғары еді. Соңғы жылдары осындай азулы құрама жасақтап көрмегендіктен, бұл жолы жігіттерімізге кәміл сенгенбіз. Алайда олар да сенім үдесінен шыға алмады. 

Егер, тым болмаса 16-орында табан тіреп қалғанымызда, жеңілдеу топқа түсер едік. Мысалы, Германияда додаға түскен «D» тобында жалғыз жолдаманы Австрия құрамасы жеңіп алды.

Біздің хоккейшілер Австрия құрамасымен осы електік сын алдында жолдастық кездесу өткізіп, 4:1 есебімен басымдық танытқан. Ал Данияда сынға түскен «F» тобында Словения хоккейшілері топ жарды (Олар Беларусь құрамасын да жеңіп кетті).

Иә, хоккейшілеріміз Сочи Олимпиадасына бара алмайтын болды. Өкінішті-ақ. Кім кінәлі? Сенімді ақтай алмаған хоккейшілер ме, ұлттық құрама ойынын жандандыра алмаған бас бапкер ме, әлде Сочи Олимпиадасы дайындығына биылғы маусым алдында ғана айрықша көңіл бөле бастаған федерация ма?! Мүмкін бұл дайындықты Ванкувер Олимпиадасы аяқталысымен жүйелі түрде бастау керек пе еді...

Соңғы рет Олимпиада ойындарына 2006 жылы жігіттеріміз қатысып келген. Енді «Ақ Олимпиадада атой салсақ» деген арманымызды 2018 жылға дейін ішімізде сақтай тұруға тура келеді...